§21. Zamānah ḳhudā hai

"zamānah ḳhudā hai, ise tum burā mat kaho"
magar tum nahīñ dekhte——zamānah faqat̤ resmān-e ḳhayāl
sabuk-māyah, nāzuk, t̤avīl
judāʾī kī arzāñ sabīl!

vuh ṣubḥeñ jo lākhoñ baras pesh-tar thīñ,
vuh shāmeñ jo lākhoñ baras baʿd hoñgī,
uñheñ tum nahīñ dekhte, dekh sakte nahīñ
kih maujūd haiñ, ab bhī, maujūd haiñ vuh kahīñ,
magar yih nigāhoñ ke āge jo rassī tanī hai
ise dekh sakte ho, aur dekhte ho
kih yih vuh ʿadam hai
jise hast hone meñ muddat lagegī
sitāroñ ke lamḥe, sitāroñ ke sāl!

mire ṣaḥn meñ ek kam-sin banafshe kā paudā hai
t̤ayyārah koʾī kabhī us ke sar par se gużre
to vuh muskarātā hai aur lahlahātā hai
goyā vuh t̤ayyārah, us kī muḥabbat meñ
ʿahd-e vafā ke kisī jabr-e t̤āqat-rubā hī se gużrā!
vuh ḳhūsh ěʿtimādī se kahtā hai:
"lo dekho, kaise isī ek rassī ke donoñ kināroñ
se ham tum bañdhe haiñ!
yih rassī nah ho to kahāñ ham meñ tum meñ
ho paidā yih rāh-e viṣāl?"
magar hijr ke un vasīloñ ko vuh dekh saktā nahīñ
jo sarāsar azal se abad tak tane haiñ!
jahāñ yih zamānah——hanūz-e zamānah
faqat̤ ik girah hai!

arrow_left §20. Reg-e dīrūz

§22. Afsānah-e shahr arrow_right