§9. Shāʿir-e dar-māñdah

zindagī tere liye bistar-e sanjāb-o-samūr
aur mere liye afrang kī daryūzah-garī
ʿāfiyat-koshī-e ābā ke t̤ufail,
maiñ hūñ dar-māñdah-o-be-chārah adīb
ḳhastah-e fikr-e maʿāsh!
pārah-e nān-e javīñ ke liye mǒḥtāj haiñ ham
maiñ, mire dost, mire saiñkṛoñ arbāb-e vat̤an
yaʿnī afrang ke gulzāroñ ke phūl!
tujhe ik shāʿir-e dar-māñdah kī ummīd nah thī
mujh se jis roz sitārah tirā vā-bastah huʾā
tū samajhtī thī kih ik roz mirā żěhn-e rasā
aur mire ʿilm-o-hunar
baḥr-o-bar se tirī zīnat ko guhar lāʾeñge!
mere raste meñ jo ḥāʾil hoñ mire tīrah naṣīb
kyoñ duʿāʾeñ tirī be-kār nah jāʾeñ
tere rātoñ ke sujūd aur niyāz
(us kā bāʿiṡ mirā ilḥād bhī hai!)

ai mirī shamʿ-e shabistān-e vafā,
bhūl jā mere liye
zindagī ḳhvāb kī āsūdah farāmoshī hai!
tujhe maʿlūm hai mashriq kā ḳhudā koʾī nahīñ
aur agar hai, to sarā-pardah-e nisyān meñ hai
tū "masarrat" hai mirī, tū mirī "be-dārī" hai
mujhe āġhosh meñ le
do "anā" mil-ke jahāñ soz baneñ
aur jis ʿahd kī hai tujh ko duʿāʾoñ meñ talāsh
āp hī āp huvaidā ho jāʾe!

arrow_left §8. Ittifāqāt

§10. Intiqām arrow_right