§20. Reg-e dīrūz
ham muḥabbat ke ḳharāboñ ke makīñ
vaqt ke t̤ūl-e alam-nāk ke parvardah haiñ
ek tārīk azal, nūr-e abad se ḳhālī!
ham jo ṣadyoñ se chale haiñ to samajhte haiñ kih sāḥil pāyā
apnī tahżīb kī pā-kobī kā ḥāsil pāyā!
ham muḥabbat ke nihāñ-ḳhānoñ meñ basne-vāle
apnī pā-mālī ke afsānoñ pah hañsne-vāle
ham samajhte haiñ nishān-e sar-e manzil pāyā!
ham muḥabbat ke ḳharāboñ ke makīñ
kunj-e māẓī meñ haiñ bārāñ-zadah t̤āʾir kī t̤araḥ āsūdah,
aur kabhī fitnah-e nā-gāh se ḍar-kar chauñkeñ
to raheñ sadd-e nigah nīñd ke bhārī parde
ham muḥabbat ke ḳharāboñ ke makīñ!
aise tārīk ḳharābe kih jahāñ
dūr se tez palaṭ jāʾeñ ẓiyā ke āhū
ek, bas ek, ṣadā gauñjtī ho
shab-e ālām kī "yā hū! yā hū!"
ham muḥabbat ke ḳharāboñ ke makīñ
reg-e dīrūz meñ ḳhvāboñ ke shajar būte rahe
sāyah nā-paid thā, sāye kī tamannā ke tale sote rahe!
§19. Ek aur shahr