§20ـ ریگِ دیروز
ہم محبّت کے خرابوں کے مکیں
وقت کے طولِ المناک کے پروردہ ہیں
ایک تاریک ازل، نورِ ابد سے خالی!
ہم جو صدیوں سے چلے ہیں تو سمجھتے ہیں کہ ساحل پایا
اپنی تہذیب کی پا کوبی کا حاسل پایا!
ہم محبّت کے نہاں خانوں میں بسنے والے
اپنی پا مالی کے افسانوں پہ ہنسنے والے
ہم سمجھتے ہیں نشانِ سرِ منزل پایا!
ہم محبّت کے خرابوں کے مکیں
کنجِ ماضی میں ہیں باراں زدہ طائر کی طرح آسودہ،
اور کبھی فتنہِ نا گاہ سے ڈر کر چونکیں
تو رہیں سدِّ نگہ نیند کے بھاری پردے
ہم محبّت کے خرابوں کے مکیں!
ایسے تاریک خرابے کہ جہاں
دور سے تیز پلٹ جائیں ضیا کے آہو
ایک، بس ایک، صدا گونجتی ہو
شبِ آلام کی "یا ہو! یا ہو!"
ہم محبّت کے خرابوں کے مکیں
ریگِ دیروز میں خوابوں کے شجر بوتے رہے
سایہ نا پید تھا، سایے کی تمنّا کے تلے سوتے رہے!
§19. ایک اور شہر